عؤمور

نه لر ایتیرمه دیم  بوآز عؤمــــــــورده!

ائنی-بویو گؤده ک، دایـــــاز عــؤمورده

بیر آن ایستادمادیم بوغـــــاز عؤمورده

گؤز یاشیم، سئل اولدو بوغماغا منی

 

قویمادی داش اوسته داشیمی ایللر

پوزدو یادداشیمی، هوشومو ایللـــــر

گتیردی یاش اوسته یاشیمی ایللــر

دؤنده ردی گئده رگی  قـــــوناغامنی

 

الی اله وورماق یاساقمی؟ سوردوم

دیــــزیمه، سینه مه، باشیما ووردوم

کئفه،کئفدن یئکه، کــــاففآرا گؤردوم

یوردو حارام، یـــاساق، قــاداغا منی

 

بؤلوندو وطـــنیم، تالاندی یـــــوردوم

پوزولدو نیظامیم، داغـــیلدی اوردوم

یوز کرن ییخــیلدیم، یوز کرن دوردوم

چـــــــــکدی ایللر آغیر سیناغا منی

 

تانــری اوزاق اولدو، چاتا بیلمه دیم

سئوگی-ده اودوزدوم، آتا بیلمه دیم

زامـــــــانین نبضینی توتا بیلمه دیم

گــاه ائله دی نؤکر، گاه  آغـــا منی

 

عــــدالت افسانه، صداقت یــــالان

گـــــونده نئچه رنگه بویانیر اینسان

غــرور یوکسکلره چکسه ده هرآن

احتیاج دوشوردو آیاغـــــــــــا منی

 

آلقیش ائل دردیله قوجـــــــالانلارا

آلقیش سؤز دوو*-وندا باج آلانلارا

باشی دار-دان اوسته اوجــالانلارا

دمیرچی! وئرسینلر صاداغـا منی.

 

*مئیدان دارلیق، دؤیوش مئیدانی

دمیرچی