قیر آتی یهرله ظولمه چاپدیراق

هارایلا چاپدیراق پاشا کوراوغلو

حماسه یاشاسین غیرت یاشاسین

تاریخلر بویونجا یاشا کوراوغلو

 

حماسه سوزو وارغیرت سوزو وار

سینه مین سونمه ین اودو کوزو وار

اصلانلار یوردوندا چاققال گوزو وار

هارایلا چاققاللار چاشا کوراوغلو

تاریخلر بویونجا یاشا کوراوغلو

هارایلا هارایین دوشسون داغلارا

قایتارسین سسیوی گئچن چاغلارا

آنلادسین سوزووو بو قورخاغلار

گئچمیشین یازیلیب داشا کوراوغلو

تاریخلر بویونجا یاشا کوراوغلو

یغیشسین بو سسه دلی لر گلسین

قیریلماز قاندالین سانی دوزلسین

سئل اولوب داغلارین باغرینی دلسین

سئلده گرک آشا داشا کوراوغلو

تاریخلر بویونجا یاشا کوراوغلو

 

دیوش چالقی سی چال اوزانلار گلسین

هارایلا هالایی پوزانلار گلسین

عدالت چاغیندا اوز آنلار گلسین

گرک ظولمون دوواری آشا کوراوغلو

تاریخلر بویونجا یاشا کوراوغلو

 

بیر ناغیل باشلادیم ناغیل سانمایین

عالم یوبانسا دا سیز یوبانمایین

آیازی دانسازدا سوزون دانمایین

بوناغیل دا یئتر باشا کوراوغلو

تاریخلر بویونجا یاشا کوراوغلو

حسن رحمانی – مرداد