"ادبیات عامه درگز" کیتابیلا تانیشلیق
+0 به یه ن
"ادبیات عامه درگز" کیتابیلا تانیشلیقیازار: احمد تکلیفی چاپشلو
یایین ائوی: مشهد, انتشارات سخن‌گستر
احمد تکلیفی چاپشلو بو کیتابین یازاری, دره‌گز شهری‌نین فوْلکلوْرونو توْپلاماقدا بؤیوک هیمّت گؤسته‌رمیش و د‌یه‌رلی بیر ایش یاپمیشدیر. دره‌گز حاققیندا- جوْغرافییا و تاریخ باخیمیندان- قیسا معلومات وئریرسه‌ده د‌یه‌رلی‌دیر. چاپشلو جنابلاری بو اثرینی آلتی فصیلده بیتریر.
ایلک فصیلده دره‌گزین طبیعتی و تاریخی و صنعتی‌نی قیسا بیر صورتده آراشدیریر. تأسوفله وئردییی معلومات چوْخ‌دا دوزگون دئییل؛ اوْ جومله‌دن بو کیتابین یاییلما تاریخینه گؤره (۱۳۷۹), شهرین جمعیتی آماری۱۳۵۱-جی ایله عایددیر. کیتابین ایکینجی فصلینده مثل‌لر, کینایه‌لر, ترکیب‌لر توْپلانمیشدیر. بورادا ۳۰۴ تعبیر, ۳۰۶ مثل و ۵۴ تعبیر وئریلمیشدیر. اوچونجو فصیل یئرلی شئعرلره عایددیر. بورادا ۱۷۳ بئیت یئرلی عامییانه شئعر, ۲۱۵ بئیت توْی شئعرلری, ۱۸ لایلالار و ۲۰ بئیت ده تعزییه مؤوضوسونا باغلی شئعرلر گلمیشدیر. دؤردونجو فصیلده داستان و تاپماجالار توْپلانمیش‌دیرکی بورادا بئش داستان, ۲۴ تاپماجا و ۲۴ بئیت سمنی پیشیرمه حاققیندا فوْلکلوْریک شئعرلرله برابر خالق عنعنه‌لریند‌ن دانیشیلمیشدیر. بئشینجی فصیلده خالقین اینانجالاری باره‌ده معلومات وئریلمیشدیر.نهایت آلتینجی فصیلده بیر سؤزلوک اوْلاراق ۲۲۰۰کلمه آچیئقلانمیشدیر.
بو کیتابین یاخشی بیر شیوه‌سی اوْلان بودورکی شعرلر عرب الیفباسیلا, سوْنرا لاتین الیفباسیلا برابر فارسجا ترجومه‌سی‌ده وئریلمیشدیر. بوندان علاوه هر فصلین اوّلینده فارسجا بیر اؤن سؤز یازیلاراق همن مؤوضو حاققیندا معلومات وئریلمیشدیر. بیز بورادا بیر بالاجا نومونه‌لر بو کیتابدان گتیره‌رک, چاپشلو جنابلارینا نایلییت‌لر دیله‌ییب, بئله ایشلرین داوامینی و داها چالیشمالارینی گؤزله‌ییریک:
دره‌گز شهری تاریخی کیتابلاردا داراگرد, نیسایا, آپاوارتاکن, خاوران, باورد, ابیورد, نسا و... آدلار عونوانیندا آدی چکیلمیشدیر. بوگون بوشهر مشهد دن ۱۳۰کیلومئتر و قوچاندان ۱۲۵ کیلومئتر, آراسی وار و ایکی مملکت- اؤزبکستان و تورکمنستان‌لا قوْنشو اوْلاراق یاخشی بیر ایقتیصادی مؤوقعّیته مالیک‌دیر. دره‌گز اشکانی و یاخود پارتلارین باش کندی اوْلموش, تاریخ بوْیو بؤیوک حادیثه‌لر باشدان کئچیرمیشدیر. بؤلگه‌نین معروف داغلاری, قیزیل داغ, کبیت‌داغ, کوران داغ و قره داغ ,آدلیم چایلاری: درونگر و زنگلانلو دور. شهرین گزمه‌لی یئرلری چئوره‌سینده اوْلان باغلار, قیرخ قیز, ایستی‌سو و ایمام قنبری آد آپارماق اوْلار.
حاضیرلایان : اسماعیل نعمتی پایدار
قایناق : ائل بیلمی - آذربایجان