دونیا گؤزون آچسین کی بو میللت گوجه گلمیش
+0 به یه ن
میللت گوجه گلمیش
میللت چیغیریر، تورکم هارای حاققیمی دانما
دولت باغیریر کس سسیوی آنلاما قانما
فرمان بوراخیر وور باتومو، ووردولار آمما
سانکی خوروزون اوستونه نارین جوجه گلمیش
دونیا گؤزون آچسین کی بو میللت گوجه گلمیش
روحوم آچیلیب لذت آلیر ائل یوروشوندن
زنجیری قیران سانکی چؤرک تئل یوروشوندن
تاریخ یارادان تبریزیمین سئل یوروشوندن
گوندوز یوروشه باشلاییب آخیر گئجه گلمیش
دونیا گؤزون آچسین کی بو میللت گوجه گلمیش
تورکون بئشییی اورمییه توفان قوپاریبدیر
تورپاق لارینا گؤز تیکه نه گؤز قوپاریبدیر
نعمتلی موغان سون سؤزو سؤیلر قوتاریبدیر
قات قات قالانیب دردلری چون لاپ دیبه گلمیش
دونیا گؤزون آچسین کی بو میللت گوجه گلمیش
دان اولدوزو تک پارلاییر اؤلکمده بیر اولدوز
پاک ائتمیش حلال امدییینی سود آنا تومروز
قافلان سایاغی قارتال اولوب قایغیلی سولدوز
حاققیم تالانیب سؤیله یرک گؤر نئجه گلمیش
دونیا گؤزون آچسین کی بو میللت گوجه گلمیش
خوی تاریخی بیر گؤزگو کیمی گؤز قاباغیندا
یاد ائل لرینه دیز چؤکوروب اؤز قاباغیندا
زنگان دایانیب اؤن جبهه ده گؤز قاباغیندا
گوج لر بیر اولوب داغ کیمی گوجدن گوجه گلمیش
دونیا گؤزون آچسین کی بو میللت گوجه گلمیش
ائل لر، قوشاچایلار، مییانا هایدیر هارایدیر
زونوزلا، ساراب، داش ماکی دا گؤر نئجه هایدیر
غئیرتلی مرندین یوروشو تبریزه تایدیر
ائل لر بیر اولوب میللته بیرلیک وجه گلمیش
دونیا گؤزون آچسین کی بو میللت گوجه گلمیش
ای آستارامیز، شانلی فریدون گؤزو سنده
قالخ اردبیله یاردیم ائله، شور ائله سنده
مشگین له، اهر قان دوغوروبدور بیلیسن ده
دوشمن گیجه لیب اوستومیزه گیج گیجه گلمیش
دونیا گؤزون آچسین کی بو میللت گوجه گلمیش
ای علم اوجاغی، ای ماراغا حوسنووه حئیران
قالخدین آیاغا غئیرتیوی ائیله دین اعلان
چیخ بیر رمه ده قایناشیری میلیونی تهران
سانکی عرفاتدا حاجی لاردیر حجه گلمیش
دونیا گؤزون آچسین کی بو میللت گوجه گلمیش
بیر عصریدی کی جان وئریسن، قان وئریسن، قان
چاتمیش زامانی اؤزلویونون، سئوگیلی جانان
جنت بوجاغی، علم اوجاغی، آذربایجان
چوخداندی زامان سنله یامان بیر لجه گلمیش
آمما یئمه غم بیر داها میللت گوجه گلمیش
حاققیم تالانیب سؤیله یرک گؤر نئجه گلمیش
دونیا گؤزون آچسین کی بو میللت گوجه گلمیش
اؤز دیلینده مدرسه اولمالیدیر هر کسه
قایناق : موغانلی
