تورکم منه چوخ فارسی قیریلداتما آی اوغلان
+0 به یه ن
تورکم منه چوخ فارسی قیریلداتما آی اوغلان
چوخ ییرغالانیب قاش گوزونو آتما آی اوغلان
هرزه گولو ائل گوللرینـه قاتما آی اوغلان
تورکم منه چوخ فارسی قیریلداتما آی اوغلان
تورکم منه چوخ فارسی قیریلداتما آی اوغلان
علم اولماسا موشگول دونوب آسان اولا بیلمز
ائللر سؤزودور تولـکودن اصـلان اولا بیلمز
ائل درد و غمین قانمایان اینسان اولا بیلمز
هرزه گولو ائل گوللرینه قاتما آی اوغلان
تورکم منه چوخ فارسی قیریلداتما آی اوغلان
آرتیق چالیشیب دوزلره اوخشاتما یالانی
تورکون آتینا تیکمه یارادیرما پالانی
آز بیلمه دماوندیدن اوغلان ساوالانی
ائل قارغیش ائدر بوغدا وئریب ساققیز آلانی
میسدن اؤتری آغ قیزیلی ساتما آی اوغلان
تورکم منه چوخ فارسی قیریلداتما آی اوغلان
باخ تاریخه گؤر کیم ده ده وه خور باخیب اوغلان
اینسان آدینی دفتره کیم یازدیریب اوغلان
کیم بابکی ساتدی عربه خانه سی ویران
کیم ائتدی خیانت بؤلونوب آزربایجان
غفلت یوخوسوندا بو قدر یاتما آی اوغلان
تورکم منه چوخ فارسی قیریلداتما آی اوغلان
مشروطه لیگی کیم گتیریب ایرانا یولداش
ستتار خانی کیملر چاغیریب تهرانا یولداش
دالدان کیم آتیب گولله نی ستتار خانا یولداش
کیم قاره باغی هدیه وئریب ایروانا یولداش
بسدیر باشا دوش باغریمی چاتداتما آی اوغلان
تورکم منه چوخ فارسی قیریلداتما آی اوغلان
بیز یاندیران اودلاردا بو گون یاندی اوشاقلار
پیس گونده، یامان یئرده آیاقلاندی اوشاقلار
داندیق دیلی بیز ریشه سی نی داندی اوشاقلار
ایندی بیزه یوخ یادلارا قورباندی اوشاقلار
بوش بوش دانیشیب بئینیمی لاخلاتما آی اوغلان
تورکم منه چوخ فارسی قیریلداتما آی اوغلان
من سؤیله میرم دیللری اؤرگشمه دانیشما
یانسین اوره گیم باشی دئسم فارسا قاریشما
آنجاق دئییرم یادلارا چوخ یانما آلیشما
هر کیم ائلیـنی دانسا،کوسوب اونلا باریشما
گولسن، خار اولوب ائل گؤزینه باتما آی اوغلان
تورکم منه چوخ فارسی قیریلداتما آی اوغلان
دوشمان اوزووه گولسه اینان تازه کلک دی
پروانه ده ییر شمعلره اوغلان کپنک دی
))آیریلمازا)) واجیب سؤزون آشکارا دئمک دی
تورکون دیلینین اوستادی آللاه دی دئمک دی
شئیطانی اهورا بئلینه چاتما آی اوغلان
تورکم منه چوخ فارسی قیریلداتما آی اوغلان
شاعر : آیریلماز