بایاتی لار

«تورک شعر نؤوونون اَن قدیم نمونه‌سی اولان "بایاتی"دیر. دئمک اولار، "بایاتی"نین یاراندیغی تاریخ، اینسان‌لارین دانیشیق تاریخی ایله برابردیر. بایاتی‌نین دؤرد میصراعی و هر میصراعین یئددی هئجاسی اولور. بیرینجی، ایکینجی و دؤردونجو میصراع‌لار عینی قافیه‌ده، اوچونجو میصراع ایسه سربست‌دیر. " بایاتی "دا اساس ایکی جور باشلیق (موراجیعت) وارکی، اونلارین بیری ایله باشلانیر. او ایکی باشلیق " عزیزیم و من آشیق " دیر. البتته باشقا موراجیعت‌لردن ده ایستیفاده اولونار. ایکینجی و یا دؤردونجو میصراع‌داکی سون دؤرد هئجانین سؤزلری عینی شکیلده باشلیغین آردینجا گلدیکده، بیرینجی میصراع یارانیر.» (1)

البته بایاتی‌لارین نئجه باشلانما باخیمیندان مختلف‌لییینی اؤیرنمک اوچون، بو حاقدا یازیلمیش ادبیات کیتاب‌لارینا باخمانی مصلحت گؤروروک. بیز بوردا ساده‌جه فولکلور قونوسو ایله ایلگیلی، تانیشلیق اوچون بیر نئچه بایاتی اؤرنک گتیرمک ایسته‌دیک.

 

عزیزیم گؤزل آلما

آغ آلما گؤزل آلما

اصیل آل چیرکین اولسون

بد اصیل گؤزل آلما

 

 

عزییَم داشه دوشر

قار یاغار داشه دوشر

قارداشون موشکول ایشی

گئنه ده قارداشه دوشر

 

 

سو گلَر آخار گئدر

ورگانی ییخار گئدر

بو دونیا بیر پنجره‌

هر گلن باخار گئدر

 

عزیم دوعا یوللادی

سالدی سووا یوللادی

اؤزی گله بیلمه‌دی

گیررو دوعا یوللادی

 ....

1- حمزه‌ خانلی حسن، تورک شعر فورمالاری، اندیشه نو، تهران، 185صفحه، ص85

..... آردی وار ....