حضرت علی (ع) فضیلتلری‌نین بیر گوشه‌سی
+0 به یه ن
حضرت علی (ع) فضیلتلری‌نین بیر گوشه‌سی
اومّتین ان چوخ بیله‌نی
مناقب خوارزمی کیتابیندا گلیب کی پیغمبر اکرم (ص) بویوروب: حکمت و معرفت و عیرفانی اون یئره بؤلدولر و دوققوز قیسمتین علی‌یه وئردیلر و بیر قیسمتین خلقین هامیسینا وئردیلر. و بیر ده بویوردو: منیم اومتیمین داها چوخ بیله‌نی مندن سونرا علی بن ابی طالب(ع) دیر.
علی‌نین (ع) زوهدی
عبداللّه رافعدن نقل اولوب کی: علی‌نین باشماقلاری خورما لیفیندن‌ایدی و پالتارینی گاهدان خورما لیفی و بعضاً دری‌ایله یاماییردی و ایکی پالتاری اون دؤرد دیرهمه آلاردی, بیرینی قنبره وئرردی و بیرینی اؤزو گئیردی. او حضرتین چؤره ک قاتیغی سیرکه‌ایدی و یا دا دوز. ایسته‌سئیدی بونلارا بیر شئی آرتیرسین گؤی آرتیراردی. تئز-تئز ات یئمه‌زدی و یئسه‌ایدی‌ده آز یئیه‌ردی و بویوراردی: قارنیزی حیوانلارین قبری ائله‌مه‌یین. قیلینجی‌نین قینی خورما لیفیندن ایدی و پالتاری قیسا و برک اولاردی.
علی (ع) عیبادتی
حضرت علی (ع) عابیدلرین عابیدی ایدی و هئچ کسین عیبادتی اونا چاتمازدی. صائِم النهار و قائِم اللیل ایدی و گوندوزلری اوروج توتور و گئجه‌لری آییق قالیر عیبادت ائدردی و گئجه گوندوز مین رکعت ناماز قیلاردی. او حضرتین آنلی سجده‌نین چوخلوغوندان دَوه دیزی کیمی قابار چالمیشدی. او حضرتین عیبادتلریندن بیری بو ایدی کی اؤز ال زحمتی‌نین پولی‌ایله مین بنده آلیب آزاد ائله‌دی.
علی‌نین (ع) جود و کرمی
علی علیه السلامین مدینه‌ده هامی آرزیسیندا اولان باغی واریدی. اونو مین دینارا ساتدی و هامیسینی مسجیدده یوخسولار و کاسیبلار آراسیندا پایلادی و ائوه قاییتدی, بیر حالدا کی اوندان بیر وعده غذا پولو دا قالمامیشدی. فاطمه علیهاالسلام بویوردو: سن بیلیرسن کی حسنین ایکی گوندور بیر شئی یئمه‌ییبلر, سن ایله من‌ده همان حالداییق. بو باغدان بیر رَطل آرپا اونو منیم نصیبیم اولمازدی؟ مولا بویوردو: ایسته‌مک ذلالتینی اوزلرینده گؤرمگه طاقتیم اولمایان جماعت, اوندان ائوه بیر شئی گتیرمگه مانع اولدو. (یارالدان: مقدس اردبیلی، صفحه66 )
یازان : حجت الاسلام میرزه عبدالصمد ملکی
