قدر گئجه‌سی‌نین فضیلتی
+0 به یه ن
قدر گئجه‌سی‌نین فضیلتی
قدر گئجه‌سی موبارک اوروجلوق آیین چوخ فضیلتلی گئجه‌سیدیر کی بو گئجه آللاهین رحمت قاپیسی آچیلار و دونیا و آخیرت حاجت و ایستکلری اوچون ارزیشلی فورصتدیر.
قدر سوره‌سی‌نین آیه‌لرینه دیقت یئتیرمکله قدر گئجه‌سی‌نین فضیلتین بیلمک اولار:
-اوندا قورآن نازیل اولوب.
-اونو آییق قالیب عیبادت ائله‌مک مین آیین عیبادتیندن افضلدیر.
-آللاهین خیر و برکتی او گئجه نازیل اولار.
-آللاهین خاص رحمتی بنده‌لرینه شامیل اولار.
-روح و فریشته‌لر او گئجه نازیل اولار.
قدر گئجه‌سی ایسلامین موقدس و موبارک گئجه‌لریندندیر. آللاه قورآندا اونو کرامت‌ایله یاد ائدیب و بیر سوره ده اونون آدینا نازیل ائدیب. ایلین بوتونلویونده قدر گئجه‌سینه تای فضیلتی و یاخشی گئجه یوخدور. بو گئجه قورآنین نازیل اولماسی و روح و ملکلرین نازیل اولما گئجه‌سیدیر. قدر گئجه‌سینده عیبادت ائله‌مک مین آیین عیبادتیندن اوستوندور.
بو گئجه اینسانلارین بیر ایللیک تقدیری: عؤمری, روزیسی و ساییر ایشلری بللی اولار. بو گئجه ملکلر یئره گلر و ایمام زمانین (عج) محضرینه گئدر و بنده‌لره موقدّر اولانی او حضرته عرضه ائدر. بو گئجه‌نی آییق قالماق, قورآن اوخوماق و موناجات ائله‌مک چوخ توصیه اولوب.
بو گئجه‌نین آیری گئجه‌لره فضیلتی بو مسأله‌لردن بللی اولور:
گوناهلارین باغیشلانماسی: آللاه پیغمبری(ص) قدر سوره‌سی تفسیرینده بویورور:
«هر کس قدر گئجه‌سی آییق قالا و مؤمین اولا و جزا گونونه اعتیقادی اولا, بوتون گوناهلاری باغیشلانار.»
رمضانین قلبی: ایمام صادق (ع) بویودو :
«آللاه کیتابیندان ایستیفاده اولور کی آللاه یانیندا آیلارین سایی اون ایکیدیر و آیلارین سولطانی رمضان آییدیر و رمضان آیین قلبی ده قدر گئجه‌سیدیر.»
قورآنین نازیل اولماسی:
ریوایتلره اساساً, قورآنین بوتونلویو قدر گئجه‌سی بیر یئرده پیغمبرین (ص) موبارک اورگینه نازیل اولوب. بو قورآنین بیر یئرده نزولی ایدی, آما اونون تدریجله نازیل اولماسی 23 ایل لفظ شکلینده اولدو.
مین آیدان اوستون:
ملکلرین و روحون قدر گئجه‌سینده یئره یئنمگی و آللاه بنده‌لرینه سلام وئرمگی اونون مین آیا شرافتی ساییلیر.
ایمام باقر (ع) بویوردو :
«قدر گئجه‌سینده ناماز, زکات و آیری یاخشی ایشلری گؤرمک آیری مین آیدان-کی اونلاردا قدر گئجه‌سی اولمایا- داها یاخشیدیر.»
یازان : حجت الاسلام میرزه عبدالصمد ملکی
