تاریخی زهتابی سیماسیندا گؤرمک چتین دئییل

زهتابی دئینده بیری سیبئریانی یوروب گلن بیر ایگیدی دوشونور. باشقاسی اؤیرنجی‌لرینی دادیزدیریب گئدن بیر اؤیرتمنی گؤز اؤنونده گؤرور.

بیری یئللری یوروب یورولماق بیلمه‌ین یاغیشلی بولودو، باشقاسی گونو گوندن چیچکله‌نن سولماق بیلمه‌ین کیملیک باغچاسی‌نی خاطیرلادیر.

تاریخچی، دیلچی، ادبیاتچی، فولکولورچو، موباریز، سیاستچی، شاعیر و باشقا عنوانلار آدینا یول یولداشی اولابیلر.هانسی‌نی سئچمک‌ هره‌نین اؤز گؤروش آچیسیندان آسیلی‌دیر.

علمی کونفرانسلارین سؤز صاحیبی، دئموکرات فیرقه‌سی‌نین چالیشقان اویه‌سی، سورگون‌، دوستاق‌، دیل اؤیرتمنی. یئنیلمزلیک داغی‌نین ذیروه‌سی و بیلگین‌لیک دنیزی‌نین لاپ دیبی.

سیز زهتابی‌نی نه‌یه بنزه‌دیرسینیز؟

منجه او هر ندن آرتیق دیلیمیزه‌ بنزه ییر و تاریخی‌میزی سیمگه‌له‌ییر.

تورک اله قیلینج آلاندا. مته خان‌، آتیللا، ارتونقا، امیر تئیمور اولور اله قلم آلاندا فارابی، یوسف خاص حاجیب، قاشقارلی محمود و نوایی اولور بو بارلی برکت‌لی تاریخی زهتابی سیماسیندا گؤرمک چتین دئییل.

یوخسا زهتابی بو تاریخی گؤسترمه‌یی باشاردیمی؟

اسکی تاریخی یازاندا دیلیمیز کیمی قدیم دیر، ملیک محمد ناغیلینی قلمه آلاندا خالقیمیز کیمی شفاهی دیلیمیز کیمی چاغداش دیر.

دیل تؤره‌سی حاقدا یازاندا دیلیمیز کیمی قایدالی‌دیر و اؤزوندن قورال قوندارماق فیکیرینده دئییل. سئودا گولونون رایحه‌سیندن بحث ائدنده دیلیمز کیمی شاعیرانه‌دیر.

باشدان کئچیردیگی گونلری‌ ده دیلیمیزه بنزه‌ییر. بیر ایل موددتینده دیل آچیر سونرا سیبئریانین سورگونو اولور اینقلابدا آزادلیغی دادیب محبوس اولور...

زهتابی سانکی دیلدیر موباریز و اؤلمز بیر خالقین دیلی...

ابراهیم ساوالان