اوف آنا دیلیم!

گؤر نه قدر قریبسن کی

سنی بیراخیب باشقا دیله یازیرلار

اؤزگه دیله آزیرلار!

 

اوف آنا دیلیم!

اوف!!! گؤر نه قدر قریبسن کی

سنله دیل آچیب

سندن قاچیرلار!

 

آه آنا دیلیم!

ائی واه!!! سنی سئومه ینلره عار اولسون!

 

دیللری لال

گؤزلری کور

قولاقلاری کار(کر) اولسون!

 

آنا دیلیم!

ائی آنا دیلیم!

ائی منیم آنامدان دوغولدوغمدان بری

ایلک سئوگیلیم!

 

آنا دیلیم

ائی آنا دیلیم!

ائی منیم ان بؤیوک وارلیغیمین وارلیق سببی

بئینیمده گئجه گوندوزلوک دولانان

بیرلیغین تبی

 

ائی وطن قوخوسو

توپراق قوخوسو

دؤرد بیر یانیندا قورولان زاواللی پوسو

سنی مندن

منی ده سندن

یقین بیل کی

قیامتلرده قوپسا

ساقین

تکجه بیر کؤهنه کیتابین

او سون

سولغون واراغینین

قیراغیندا یازیلان یالنیز سؤزجویون

اوخونوشونا آپاران زامان قدرینده بئله

آیری سالا بیلمز!

 

آنا دیلیم

ائی منیم ایلک سئوگیلیم!

 

سنی سونسوزا قدر سئویرم!

سونسوزلارا قدر سئویرم!

سئویرم،

سئویرم سنی… !

مهرداد کسانی.